निरोपगीत (जाहले भजन आम्ही नमितो तव चरणा)

जाहले भजन आम्ही नमितो तव चरणा, नमितो तव चरणा ॥

वारूनिया विघ्ने देवा रक्षावे दीना || धृ ||

दास तुझे आम्ही देवा तुजलासी ध्यातो ॥

प्रेमे करूनिया देवा गुण तुझे गातो ॥ जा ॥१॥

तरी द्यावी सिद्धि देवा हेचि वासना, देव हेचि वासना ॥

रक्षुनिया सर्वा द्यावी आम्हांसी आज्ञा ॥ जा ॥२॥

मागणे ते देवा आता एकचि आहे ॥

तारूनिया सकळा आम्हा कृपादृष्टी पाहे ॥जा ॥३॥

जेव्हा सर्व मिळू ऐशा या ठाया, ऐशा या ठाया ॥

प्रेमानंदे लागू तुझी कीर्ती गावया ॥ जा ॥४॥

सदा ऐशी भक्ती राहो आमुच्या मनी, आमुच्या मनी ॥

हेची देवा तुम्हा असे नित्य विनवणी ॥जा ॥५॥

वारूनिया संकटे आता आमुची सारी, आता आमुची सारी ।

कृपेची साउली देवा दीनावरी करी ॥ जा ॥६॥

निरंतर आमुची चिंता तुम्हा असावी ॥ चिंता तुम्हा असावी ॥

सर्वाची लज्जा देवा तुम्ही रक्षावी ॥ जा ॥७॥

निरोप घेतो आता आम्हा आज्ञा असावी, आज्ञा असावी ॥

चुकले आमचे काही त्याची क्षमा असावी ॥ जाहले.॥८॥